Main Menu

કાગળ – સુરેશ દલાલ.

 

 

ઊભી ઊભી તારો હું કાગળ વાંચું : તારા અક્ષરમાં મારું ત્રિભુવન.
એક એક શબ્દની ડાળી પર ઝૂલું ને ધરતી પર અવતરે ગગન.

હવે આખો દિવસ ગીત ગુંજ્યા કરીશ
અને રાતે હું તો સપનાંની નાવમાં,
વાત મારી ઘૂમટો તાણી બેઠી છે
મને પૂછો નહીં પાગલ કિયા ભાવમાં ?

મારી શય્યા પર ઓશીકાને થાય છે રોમાંચ અને ઓઢવાનું ઝંખે એક જણ.
ઊભી ઊભી તારો હું કાગળ વાંચું : તારા અક્ષરમાં મારું ત્રિભુવન.

આખી દુનિયા હવે વ્હાલી લાગે :
મારી મુઠ્ઠીમાં ચાંદની ને તડકો,
હોઠને કહું કે હવે રહેવાનું ચૂપ
તો આંખમાંથી છલકે ઉમળકો.

કેમ કરી કેવી રીતે સંભાળું મને : મારી ફરકે છે ડાબી પાંપણ.
ઊભી ઊભી તારો હું કાગળ વાંચું : તારા અક્ષરમાં મારું ત્રિભુવન.

Source: અમીઝરણું